15 shtator 2026
Falë bujarisë së OST – Universitetit të Shkencave të Aplikuara të Zvicrës Lindore, me mbështetjen e Liridona Makicës, mike e Fondacionit AMC, gjashtë shtretër spitalorë kanë mbërritur në Kosovë. Katër prej tyre i janë dhuruar Klinikës së Pediatrisë në Qendrën Klinike Universitare të Kosovës (QKUK) në Prishtinë, ndërsa dy i janë dhuruar Qendrës Kryesore të Mjekësisë Familjare në Viti.
Ky donacion u përgjigjet nevojave konkrete të identifikuara në bashkëpunim me institucionet përfituese. Spitalet dhe qendrat e mjekësisë familjare në mbarë Kosovën vazhdojnë të kenë nevojë për përmirësime në infrastrukturë, si dhe për mbështetje të vazhdueshme përmes donacioneve dhe investimeve në pajisje mjekësore esenciale. Përmes partneriteteve të tilla, AMC punon së bashku me institucionet publike shëndetësore dhe donatorët për të ndihmuar në krijimin e kushteve më të mira për pacientët dhe profesionistët shëndetësorë.
“Fëmijët dhe familjet që kërkojnë kujdes shëndetësor meritojnë mjedise të sigurta, dinjitoze dhe të pajisura siç duhet. Çdo kontribut konkret mund të sjellë një ndryshim domethënës. U jemi mirënjohës partnerëve tanë që na mundësojnë t’u përgjigjemi nevojave të identifikuara së bashku me institucionet shëndetësore,” tha Drejtoresha Ekzekutive e AMC-së, Rina Demiri Spahija.
Dr. Alije Keka Sylaj, Drejtoreshë e Klinikës së Pediatrisë, tha: “Ky donacion i përgjigjet një nevoje reale të klinikës sonë dhe do të mbështesë drejtpërdrejt kujdesin që u ofrojmë fëmijëve dhe familjeve. E vlerësojmë sinqerisht këtë mbështetje të çmuar dhe bashkëpunimin tonë të vazhdueshëm.”
“I jemi shumë mirënjohës AMC-së për donacionin e dy shtretërve, të cilët do të na ndihmojnë të përmirësojmë punën tonë të përditshme dhe të ofrojmë shërbime më të mira për pacientët tanë,” tha Dr. Vjollca Kadolli, Drejtoreshë e Qendrës Kryesore të Mjekësisë Familjare (QKMF) në Viti.
AMC shpreh falënderimet e sinqerta për OST-në, Liridona Makicën, Klinikën e Pediatrisë në QKUK dhe Qendrën Kryesore të Mjekësisë Familjare në Viti për mbështetjen dhe bashkëpunimin e ngushtë.
AMC mbetet e përkushtuar në fuqizimin e kujdesit shëndetësor për nënat dhe fëmijët në Kosovë përmes partneriteteve, donacioneve të pajisjeve mjekësore, edukimit, zhvillimit profesional dhe avokimit.
