Letra e fundvitit
16.12.2015
Prishtinë, 15 dhjetor 2015 –
Të dashur miq,
Po ju dërgojmë falenderimet më të sinqerta të gjithë juve që mbështetët Aksionin për Nëna dhe Fëmijë tërë këtë vit! Çdo dhjetor, shumica prej nesh mendojmë për dhuratën e fundvitit dhe sa herë afrohet momenti për ta bërë atë sfidohemi se ku ta bëjmë. Nëse nuk e keni bërë ende dhuratën e fundvitit do t’ju luteshim të konsideroni një donacion për “Aksionin për Nëna dhe Fëmijë” në Kosovë.
Viti 2015 ishte një vit shumë i suksesshëm për Aksionin për Nëna dhe Fëmijë! Duke iu falenderuar mbështetjes së shumë partnerëve, donatorëve dhe miqve, ne së bashku mund të krenohemi për:
* Arritjen e 230 flakonave të medikamentit të Surfaktantit në Kosovë – medikament ky jetik për të zhvilluar mushkëritë tek foshnjet e lindura para kohës dhe për t’shpëtuar ato. 250-300 foshnje trajtohen çdo vit me këtë medikament;
* Dorëzimin e aparatit të parë për përcaktimin e Proteinës C Reaktive (CRP) në Klinikën Intensive të Neonatologjisë që mundëson kryerjen e analizës së gjakut pranë shtratit të foshnjes dhe jo më në laboratorët jashtë klinikës. Kjo pajisje shfrytëzohet nga 30-35 foshnje çdo ditë;
* Hapjen e dy Qendrave të reja Informuese për Shëndetin e Gruas në Prishtinë dhe Ferizajku femrat kanë çasje në informatën bazike rreth shtatëzanisë, lindjes, kujdesit ndaj foshnjes e informatat e tjera rreth kujdesit antenatal të marra në gjuhën amë në një ambient të këndshëm dhome;
* 1200 gra që deri më sot kanë përfituar nga shërbimet pa pagesë të Qendrës Informuese për Shëndetin e Gruas. 80% e këtyre deklarojnë se janë më të përgatitura për procesin e lindjes dhe si rezultat kanë më pak komplikime dhe eksperiencë më të mirë gjatë lindjes;
* 700 femra që kanë përfituar nga testet pa pagesë rreth kancerit të qafës së mitrës me një nga metodologjitë më të avancuara: citologjinë e lëngshme. Kjo metodologji është konstatuar si një nga metodat më të sakta në zbulimin e kancerit falë kualitetit të pastër të mostrës dhe si e tilë është e vetmja në Kosovë;
* Implementimin e hulumtimit të parë rreth kostove dhe karakteristikave të lindjeve në Kosovë me të cilën ndërtuam një bazë të fuqishme për pozicionimin avokues të fondacionit karshi skemave të sigurimeve shëndetësore për nënat e fëmijët.
Shkalla e vdekshmërisë neonatale sot arrin në 10 për 1,000 lindje, krahasuar me atë të 29/1,000 menjëherë pas luftës në Kosovë. Sivjet u deklaruan 0 vdekje maternale. Një arritje e tillë është punë e palodhshme e stafit të Klinikës së Neonatologjisë, Klinikës së Gjinekologjisë, institucioneve, partnerëve e organizatave të shumta, si dhe e kontributit tuaj – miq, anembanë globit që mbështetni këtë kauzë!
Këto arritje gjatë këtij viti tregojnë rolin e fuqishëm të përkrahjes suaj dhe reflektojnë besimin tonë se fondacionet humanitare nuk mund të ekzistojnë pa ju!
Ne besojmë se me ndihmën e partnerëve dhe donatorëve, miqve tanë, do të ndihmojmë që të krijojmë kushte më të mira shëndetësore për nënat dhe fëmijët, duke i mundësuar kështu fëmijës një fillim të mirë të jetës. Fondacioni ynë është i përkushtuar ndaj realizimit të këtij qëllimi, por nuk mund ta bëjmë atë pa ndihmën tuaj.Faleminderit dhe urimet më të përzemërta për festat e fundvitit.
Aksioni për Nëna dhe Fëmijë